اٹھ غریبا بھنگڑا پا
بھکھا اپنا ڈھڈّ وجا
جشنے پاکستان منا
اٹھ غریبا بھنگڑا پا
جھنڈا ایہدا پھڑکے رکھ
نیویں اپنی کرکے اکھ
کٹھے کرکے ساڈے ککھّ
اپنا ٹھنڈا چُلھا تاء
وچ امریکہ ساڈا ناں
جد تکّ سر تے اوہدی چھاں
کٹا چوئیے بھاویں گاں
ایہہ لے جھنڈی نٹھا جا
اپنے بالاں نوں پرچہ
تینوں دھرتی سوہنی لگے
شاوا شاوا انّھے ڈھگے
تاہیؤں تینوں کردے اگے
ڈانگاں سوٹے گولی خواہ
وچّ شریکاں ناں چمکا
ولّ اسماناں توں نہ ویکھ
ساڈے ہتھیں تیرے لیکھ
بھکھا ساڈے ہتھاں ولے ویکھ
جِناں دئیے اونا کھوا
اِس دھرتی دے اسیں خدا
اصلی پاکستان اسیں
تاہیؤں تے پردھان اسیں
دھرتی وی اسمان اسیں
ساڈے پیراں ہیٹھاں لاء
ساڈے بہہ کے پیر دبا
اکو تے نہیں ریہنی رتّ
اک دہاڑے ٹٹنے بتّ
اس دھرتی دا توں ایں پتّ
ستا تیرا اجے خدا
اوکڑ کولوں نہ گھبرا
ڈھڈوں بھاویں بھکھا رہ
دھپے بھاویں چھاویں بہو
جیوے جیوے دھرتی کہُ
دودھ غضہ تے مٹی پا
سدھراں دھرتی لئی دفنا
وچ ہواواں پھردی 'واز
آون والا تیر راج
تیرے ہتھیں ایہدی لاج
اپنے ستے لیکھ جگا
کسّ لنگوٹا پھڑ لے ڈانگ
کیوں نہیں دیندا اپنی بانگ
جینا لعنت بزدل وانگ
توں وی اپنا گھنڈ ہٹا
امریکہ دے یاراں کول
دھرتی دے غداراں کول
ظالم تے مکاراں کول
لوٹے تے بدکاراں کول
تیرا پاکستان گیا
اپنا پاکستان بچا
اٹھ غریبا بھنگڑا پا
بھکھا اپنا ڈھڈّ وجا
